ನಿವೃತ್ತಿ ಕಡ್ಡಾಯಗೊಳಿಸಿ

           ಜನ ಸೇವೆ ಮಾಡಲು ರಾಜಕೀಯಕ್ಕೆ ಸೇರಲೇಬೇಕೆಂಬ ನಿಯಮವಿಲ್ಲ. ಆದರೂ ರಾಜಕಾರಣವನ್ನು ಒಂದು ವಾಹಿನಿಯ ರೀತಿ ಬಳಸಿಕೊಂಡಲ್ಲಿ ತಪ್ಪಿಲ್ಲ. ಆದರೆ ಇದಕ್ಕೊಂದು ನಿಗದಿತ ವಯೋಮಿತಿ ಸೂಚಿಸುವ ಅಗತ್ಯವಿದೆ. ಯುವ ಆಕಾಂಕ್ಷಿಗಳಿಗೆ ಯೋಗ್ಯತೆಯ ಮೇರೆಗೆ ಆದ್ಯತೆ ನೀಡಲು ಇದು ಸಹಕಾರಿ. ಚುನಾವಣೆಗೆ ಸ್ಪರ್ಧಿಸಲು ಕನಿಷ್ಠ ವಯೋಮಿತಿ ಇರುವಂತೆ, ಗರಿಷ್ಠ ಮಿತಿಯನ್ನು ಇಡಬಹುದಲ್ಲವೇ? ಇದರಿಂದ ಒಂದು ಸೇವೆಯಿಂದ ನಿವೃತ್ತರಾಗಿ, ಅಧಿಕಾರ-ಪ್ರಚಾರ ಗಿಟ್ಟಿಸಲು ರಾಜಕೀಯಕ್ಕೆ ಧುಮುಕುವವರ ಹಾವಳಿ ತಪ್ಪುತ್ತದೆ. ರಾಜಕೀಯದ ಘನತೆ ಕಾಪಾಡಿದಂತೆಯೂ ಆಗುತ್ತದೆ.

ಆಯುಷ್ಯ ಕಡಿಮೆಯಾದಂತೆ, ಆರೋಗ್ಯವೂ ಹದಗೆಡುತ್ತದೆ. ತನ್ನ ಕುಟುಂಬಕ್ಕಾಗಿ ಇನ್ನಷ್ಟು ಧನ-ಆಸ್ತಿ ಸಂಪಾದಿಸಬೇಕೆನ್ನುವ ಬಲವಾದ ಹಂಬಲವೂ ಉಂಟಾಗುತ್ತದೆ. ಹಾಗಾಗಿ ಇಂತಹ ಪರಿಸ್ಥಿಯಲ್ಲಿರುವವರು ಸರ್ವತೋಮುಖ ಪ್ರಗತಿಯ ಕಡೆ ಎಷ್ಟು ಗಮನ ಹರಿಸಲು ಸಾಧ್ಯ? ಆದ್ದರಿಂದ ರಾಜಕೀಯ ನಿವೃತ್ತಿಯ ವಯಸ್ಸನ್ನು 60 ರಿಂದ 65 ರೊಳಗೆ ಕಡ್ಡಾಯಗೊಳಿಸಿದರೆ ಸೂಕ್ತ. ನಿಯಮಿತ ಕಾಲಾವಧಿಯೊಳಗೆ ಸಕ್ರಿಯ ರಾಜಕಾರಣ ಮಾಡಿ, ಜನರಿಗೆ ಬೇಡವಾಗುವ ಮೊದಲು ಗೌರವದಿಂದ ಹೊರ ನಡೆಯುವುದು ಒಳಿತು. ಇತ್ತೀಚೆಗೆ, ಚುನಾವಣೆ ಸಂದರ್ಭಗಳಲ್ಲಿ ತಾನು ರಾಜಕೀಯ ನಿವೃತ್ತಿ ಘೋಷಿಸುತ್ತೇನೆಂದು ಬೊಂಬಡ ಬಾರಿಸಿ, ಜನರ ವಿಶ್ವಾಸಗಳಿಸುವ ತಂತ್ರಗಳು ನಡೆಯುತ್ತಿವೆ. ಇದನ್ನು ಗಂಭೀರವಾಗಿ ಪರಿಗಣಿಸಿ, ರಾಜಕೀಯ ನಿವೃತ್ತಿಯನ್ನು  ಕಾರ್ಯರೂಪಕ್ಕೆ ತರುವಲ್ಲಿ ಸಂಬಂಧಪಟ್ಟವರು ಗಮನಹರಿಸಿದರೆ ಒಳಿತು.

ದೀವಟಿಗೆ by ಸಂದೀಪ ಫಡ್ಕೆ, ಮುಂಡಾಜೆ is licensed under a Creative Commons Attribution-NonCommercial-NoDerivs 2.5 India License