ಜಾತಿರಾಜಕಾರಣ ಯಾಕೆ ಬೇಕು..?

      ನಮ್ಮದು ಜ್ಯಾತ್ಯಾತೀತ ದೇಶ.ಹೀಗೆಂದು ಹೇಳಿಕೊಳ್ಳುವವರಿಗೆ ಲೆಕ್ಕವಿಲ್ಲ.ಆದರೂ,ಅನೇಕ ರೀತಿ-ರಿವಾಜು,ಜಾತಿ-ಧರ್ಮಗಳನ್ನು ಹೊಂದಿರುವ ದೇಶದಲ್ಲಿ ಸಾಮರಸ್ಯ ಕಾಣಬೇಕಾದರೆ ಜ್ಯಾತ್ಯಾತೀತತೆಯ ಕಡೆ ಒಲವು ಮೂಡಿಸುವ ಪ್ರಯತ್ನ ಮಾಡುವ ಅನಿವಾರ್ಯತೆ ಇದೆ.ಸರಳ ನಡೆ-ನುಡಿ,ತಾತ್ವಿಕ ವಿಚಾರಗಳ ಕುರಿತ ಚರ್ಚೆ,ಸಹೋದರತೆಯನ್ನು ಸಾರುವ ಗುಣಗಳನ್ನು ಬೆಳೆಸಿಕೊಳ್ಳುವ ರೂಢಿ ಮಾಡಿಕೊಳ್ಳಬೇಕಿದೆ.ಜನರ ನಡುವೆ ಒಮ್ಮತದ ನಿರ್ಧಾರ ಕೈಗೊಳ್ಳಲು ಪ್ರಯತ್ನಗಳು ಸಾಗಬೇಕಿವೆ.ದಿನೇ-ದಿನೇ ಹೆಚ್ಚುತ್ತಿರುವ ಜನಸಂಖ್ಯೆಯಲ್ಲಿ ಕೆಲವೊಂದು ಜಾತಿ-ಧರ್ಮಕ್ಕೆ ಸೇರಿದವರ ಸಂಖ್ಯೆ ಜಾಸ್ತಿಯಿರಬಹುದು.ಇದರಿಂದ ಸಾಮಾಜಿಕ ಬದಲಾವಣೆಗಳು ಸಾಧ್ಯ.ಹೀಗಾಗಿ ಸಮತೋಲನ ಕಾಯ್ದುಕೊಳ್ಳುವ ಜವಾಬ್ದಾರಿ ಮತ್ತೆ ಜನರದೇ ಆಗಿರುತ್ತದೆ.ಆದರೆ ಇದೆಲ್ಲಕ್ಕೂ ಸಂವಿಧಾನತ್ಮಕ ರೂಪು-ರೇಷೆಗಳಿರುತ್ತವೆ.ಮತದಾನದ ಮೂಲಕ ಆಯ್ಕೆಯಾಗಿರುವ ವ್ಯಕ್ತಿ ಊರಿನ ಪ್ರತಿನಿಧಿಯಾಗಿರುತ್ತಾನೆ.ರಾಜಕೀಯ ಪಕ್ಷಗಳು ಮೊದಲ ಹಂತದಲ್ಲಿ ಜನರನ್ನು ವಿಭಾಗಿಸಿಬಿಡುತ್ತದೆ.ಇಲ್ಲಿ ನಡೆಯುವ ಎಲ್ಲಾ ಲೆಕ್ಕಾಚಾರಗಳು ಜನರ ಹಿತದೃಷ್ಠಿಯಿಂದ ಎಂಬ ಮುಖವಾಡ ಹೊತ್ತಿರುತ್ತದೆಯಲ್ಲದೆ ಅಸಲಿ ಅಂಶ ಬೇರೆಯದೇ ಆಗಿರುತ್ತದೆ.

         ರಾಜಕೀಯಕ್ಕೂ ಜಾತಿ-ಧರ್ಮಕ್ಕೂ ಯಾವುದೇ ಸಂಬಂಧವಿಲ್ಲ.ಆದರೆ ಇಂದು ನಡೆಯುತ್ತಿರುವುದೆಲ್ಲ ಜಾತಿ ರಾಜಕಾರಣವೆ.ಇದರ ಬೇರು ವಿಶಾಲವಾಗಿ ಹರಡಿ ನಿಂತಿದೆ.ಮತದಾರರನ್ನು ವಿಕೇಂದ್ರಿಕರಿಸಲು ಜಾತಿಯೆಂಬ ಅಸ್ತ್ರದ ಉಪಯೋಗ ಅವ್ಯಾಹತವಾಗಿ ನಡೆಯುತ್ತಿದೆ.ಚುನಾವಣೆ ಬಂತೆಂದರೆ ಸ್ಪರ್ಧಿಯನ್ನು ಕಣಕ್ಕಿಳಿಸುವ ಮೊದಲು ಆಯಾಯ ಕ್ಷೇತ್ರದಲ್ಲಿ ಯಾವ ಜಾತಿ ಜನಸಂಖ್ಯೆ ಪ್ರಬಲವಾಗಿದೆ ಎಂಬುವು
ಮುಖ್ಯವಾಗಿಬಿಡುತ್ತದೆ.ಇದರಿಂದಾಗಿ ಸಮರ್ಧ ನಾಯಕನ ಆಯ್ಕೆಯಾಗುವುದೇ ಇಲ್ಲ.ಪವಿತ್ರ ಧರ್ಮಗಳ ಹೆಸರಿನಲ್ಲಿ ತಮ್ಮ ಬೇಳೆ ಬೇಯಿಸಿಕೊಳ್ಳುವ ರಾಜಕಾರಣಿಗಳು ಅನ್ಯ ಕೋಮಿನ ನಡುವೆ ವಿವಾದಗಳು ಭುಗಿಲೇಳಲು ಕಾರಣವಾಗುತ್ತಿದ್ದಾರೆ.ಇಲ್ಲಿ ಹೆಚ್ಚು ಕಷ್ಟ ಅನುಭವಿಸುವವರು ಕೆಳಸ್ತರದ ಜನ.ಚುನಾವಣೆಯ ವೇಳೆ ಆಮಿಶಗಳನ್ನು ಒಡ್ಡಿ ತಮ್ಮೆಡೆಗೆ ಸೆಳೆದುಕೊಳ್ಳುತ್ತಾರೆ.ತಮ್ಮದೇ ಕೋಮಿನವನೆಂದು ಜನರೂ ಆಯ್ಕೆ ಮಾಡುತ್ತಾರೆ.ಆದರೆ ಚುನಾವಣೆಯ ನಂತರ ಭರವಸೆಗಳೆಲ್ಲ ಹುಸಿಯಾಗಿ ಬಿಡುತ್ತವೆ.

   ಭಾರತದಂತಹ ಅಭಿವೃದ್ಧಿ ಹೊಂದುತ್ತಿರುವ ದೇಶದಲ್ಲಾಗುತ್ತಿರುವ ಜಾತಿರಾಜಕಾರಣ ಪ್ರಜಾಪ್ರಭುತ್ವಕ್ಕಾಗುತ್ತಿರುವ ದೊಡ್ಡ ಅವಮಾನವೇ ಸರಿ.ಇದನ್ನು ತಡೆಗಟ್ಟಲು ಒಂದು ಮಾನದಂಡದ ಅಗತ್ಯವಿದೆ.ಶಿಕ್ಷಣದ ಗುಣಮಟ್ಟ ಕಡಿಮೆಯಿರುವ ಜಾತಿ ಯಾ ಧರ್ಮದ ಜನಸಂಖ್ಯೆ ಹೆಚ್ಚಾಗಿಯೇ ಇರುತ್ತದೆ.ಹಾಗಾಗಿ ಅಂಧವರಲ್ಲೇ ಒಬ್ಬರನ್ನು ಚುನಾಯಿಸುವ ತಂತ್ರ ನಡೆಯುತ್ತಿದೆ.ಇದರಿಂದ ಆಡಳಿತ ಮತ್ತು ತಾನು ಪಾಲಿಸಬೇಕಾದ ಕರ್ತವ್ಯಗಳ ಬಗ್ಗೆ ಮಾಹಿತಿಯೇ ಇಲ್ಲದವರು ಗದ್ದುಗೆಯೇರುತ್ತಾರೆ.ನಾಡಿನ ಸಮಗ್ರ ಅಭಿವೃದ್ಧಿಗೆ ಒಳ್ಳೆಯ ನಾಯಕರು ಬೇಕೆ ವಿನಃ ಕಳ್ಳ-ಕಾಕರಲ್ಲ.ಸಮಾಜದ ಒಂದು ಕೋಮಿನ ಜನರನ್ನಷ್ಟೇ ಸಂತೋಷಪಡಿಸುವುದರಲ್ಲಿ ಅರ್ಧವಿಲ್ಲ.ಈ ರೀತಿಯ ಸನ್ನಿವೇಶಗಳೇ  ಕೋಮುವಾದಿ ಸಂಘಟನೆಗಳ ಉಗಮಕ್ಕೆ ನಾಂದಿಯಾಗುತ್ತವೆ. ಇಲ್ಲವೇ ಜಾತಿವಾರು ಪ್ರತ್ಯೇಕ ರಾಜ್ಯಗಳ ಬೇಡಿಕೆಗೂ ಕಾರಣವಾಗಬಹುದು.ಜಾತಿಯ ಹೆಸರಿನಲ್ಲಿ ಮುಗ್ಧರ ಬಲಿ ನಡೆಯುತ್ತಲೇ ಇದೆ.ಇದು ಕೊನೆಗಾಣಬೇಕಾದರೆ ಮೊದಲು ಜಾತಿರಾಜಕಾರಣ ನಿಲ್ಲಬೇಕು.ಜ್ಯಾತ್ಯಾತೀತ ಪಕ್ಷಗಳೆಂದು ಸಾರಿದರಷ್ಟೇ ಸಾಲದು,ಕಾರ್ಯಗತಕ್ಕೆ ಬರಬೇಕು.